‘हेल्लो जिन्दगी’लाई नायिकाको छैन साथ, प्रदर्शकले के गर्लान् ?

नेपाली बक्स अफिसमा ‘आरआरआर’को क्रेज चलिरहेको छ । शनिबार बिदाको दिन मात्र होइन, सोमबार पनि फिल्मको व्यापारका कुनै गिरावट आएको छैन । यो क्रम केही हप्ता चल्ने निश्चित छ । यस्तो अवस्थामा आउँदो शुक्रबारदेखि नेपाली फिल्म ‘हेल्लो जिन्दगी’ रिलिज हुँदैछ । यो साता नै रिलिज हुनुपर्ने फिल्म ‘आरआरआर’सँग डराएर एक साता पर सरेको थियो ।

तर, अर्को साता पनि ‘आरआरआर’को क्रेजमा कुनै कमी नआउने संकेत स्पष्ट छ । जसको असर ‘हेल्लो जिन्दगी’लाई पर्ने देखिएको छ । यो फिल्मको प्रचारमा कलाकारले साथ नै दिएनन् । फिल्मका मुख्य कलाकारद्धय प्रियंका कार्की र दीपिका प्रसाँइले फिल्मको प्रचारमा साथ नदिदा निर्देशक एभरेष्ट सूर्य बोहरा आक्रोशित बने ।

नायिकाको साथ नपाएको फिल्मले प्रदर्शकको साथ कस्तो पाउँला त्यो केही दिनमै थाहा हुनेछ । तर, ‘आरआरआर’बाट लामो समयपछि बम्पर कमाईको स्वाद चाखिरहेका प्रदर्शकले नेपाली फिल्मलाई शो देलान् त ?