अस्करमा लफडाः पत्नीको मजाक उडाएपछि विल स्मिथले होस्टलाई कुटे

अमेरिकाको लस एन्जेलिसमा आयोजना भएको विश्वकै चर्चित फिल्मी अवार्ड ‘अस्कर अवार्ड’को मञ्चमा हलिउड नायक विल स्मिथले कार्यक्रम संचालकलाई कुटेका छन् । कार्यक्रम संचालन गरिरहेका क्रिस रकले विल स्मिथकी पत्नी जाडा पिंकेट स्मिथको बिषयमा जोक्स गरेका थिए ।

यो कुरालाई सहन नसकेका विल स्मिथ मञ्चमा पुगे र क्रिसको गालामा थप्पड हानेका छन् । विलले रकलाई आफ्नी श्रीमतीको नाम अब कहिले पनि उच्चारण नगर्न चेतावनी समेत दिएका छन् ।

क्रिस रक अमेरिकाका सफल कमेडियन हुन् । गालामा थप्पड परेपछि पनि रकले कार्यक्रमलाई अगाडि बढाएका थिए । सामाजिक संजाल र मिडियामा भाइरल भएको भिडियोमा क्रिस र विल स्मिथविच केही समय भनाभन समेत भएको थियो । सो समयमा स्मिथले बारम्बार आफ्नो मुखबाट श्रीमतीको नाम नलिने चेतावनी दिइरहेको सुन्न सकिन्छ ।