‘कर्णाली लुक्स’मा तारिफ योग्य स्वस्तिमा

दीपेन्द्र के खनाल निर्देशित फिल्म ‘चिसो मान्छे’को टिजर सार्वजनिक गरिएको छ ।

आगामी असार ३ मा प्रदर्शन हुने स्वस्तिमा खड्का र अर्पण थापा मुख्य भूमिका रहेको फिल्म ‘चिसो मान्छे’को शुक्रबार टिजर रिलिज भएको हो ।

‘चिसो मान्छे’को टिजरमा कथा र चरित्रलाई दर्शकसँग साक्षात्कार गराउने प्रयास गरेको छ ।

टिजरमा अभिनेता अर्पण थापा दाह्री काटिरहेको देखिन्छन् भने स्वस्तिमा चिया खाँदै उनलाई हेरिरहेकी छिन् । देशभक्त खनालले उनको त्यो हेराइलाई भंग गर्ने प्रयास गरेका छन् । यसपछि आउने दृश्यले ट्रकमा राखिएको लासलाई फोकस गर्छ र त्यो ड्रोनसटसँगै टाढा टाढा हुँदै जान्छ । टिजरमा अभिनेता अर्पण र देशभक्त खनाल पनि अटाएका छन् ।

छायांकार र लेखकको जिम्मेवारी पनि सम्हालेका निर्देशक खनालले फिल्मको छोटो दृश्यमार्फत स्वस्तिमाको फरक लुक्स र अभिनय तारिफ योग्य रहेको धेरैले उल्लेख गरेका छन् । फिल्मले लास लिएर यात्रामा निस्कने तीन चरित्रको कथा प्रस्तुत गर्छ ।

दीपेन्द्र के खनालको लेखन, छायांकन तथा निर्देशन रहेको ‘चिसो मान्छे’मा प्रयोग गरेको संवादले पात्रहरू सुदुरपश्चिमका बाजुरा र अछामलाई प्रतिनिधित्व गरेको बुझ्न सकिन्छ ।

कर्णाली क्षेत्रको कथा भन्ने यो फिल्मलाई डीएस डिजिटल प्रालिको ब्यानरमा शर्मिला पाण्डेले निर्माण गरेकी हुन् । फिल्मलाई दीर्घ गुरुङले सम्पादन गरेका छन् । ‘चिसो मान्छे’मा देशभक्त खनाल, आशान्त शर्मा, प्रभाकर न्यौपाने, रामबाबु रेग्मीलगायतका कलाकारले पनि अभिनय गरेका छन् ।

फिल्मले स्थानीय निकायको चुनावका कारण रिलिज मिति सारेर असार ३ मा पुर्याएको छ । केही समय अघि सार्वजनिक पोस्टरले सामाजिक सञ्जालमा राम्रै प्रशंसा पाएको थियो ।