‘मन्त्र’को ट्रेलरः छायांकन बाहेक अन्य पक्ष छैन अपेक्षित

हिमालयन लभ स्टोरीको रुपमा प्रचार गरिएको नेपाली फिल्म ‘मन्त्र’को ट्रेलर सार्वजनिक भएको छ । आज सार्वजनिक भएको ट्रेलरमा नायक सौगात मल्ल र नायिका दिया पुनको प्रेम सम्बन्धलाई देखाइएको छ । हिमालय क्षेत्रमा हुने प्रेमको कथालाई उतारिएको चलचित्रमा सौगात मल्ल, वुद्दि तामाङ, दिया पुन, नमिता तामाङ, पासाङ डी शेर्पा, वीर विक्रम लामाको मुख्य भूमिका छ ।

खिल बहादुर गुरुङको निर्देशनमा तयार भएको फिल्मलाई सुरेश कार्की, रविराज कार्की र सुभ श्रेष्ठले निर्माण गरेका हुन् । फिल्ममा देवेन्द्र मानन्धर कार्यकारी निर्माताको रुपमा छन् । साम्तेन भुटिया, परिच्छेद सेन र सुनिल न्यूरोको लेखन रहेको फिल्ममा संजय लामाको छायांकन, मित्र डी गुरुङको सम्पादन, सन्तोष सुनारको संगीत छ ।

यो फिल्मको ट्रेलर हेर्दा यसको छायांकन पक्ष उत्कृष्ट लाग्छ । छायांकार संजय लामाले १८ दिनमा फिल्म खिचिएको बताए । तर, फिल्मका कार्यकारी निर्माताले भनेको कुरालाई मान्ने हो भने, फिल्मका अझै थुप्रै दृश्यहरु ट्रेलरमा समावेश गरिएको छैन ।

तर, फिल्मको ट्रेलरलाई भने अपेक्षित बनाउन निर्माणपक्ष चुकेको छ । किनकी, ट्रेलर हेरेर नै दर्शक हलसम्म जाने भएकाले पनि फिल्मको ट्रेलर निर्माण गर्दा मिहिनेत गर्नुपर्ने हो । यसमा निर्माणपक्ष चुकेको छ ।