ट्रेलर अपेक्षित आएन भने ‘ए मेरो हजुर ४’लाई गाह्रो छ

वैशाख १ गतेबाट रिलिज हुन लागेको फिल्म ‘ए मेरो हजुर ४’को ट्रेलर बुधबार रिलिज हुँदैछ । फिल्मको २ वटा गीत रिलिज भैसकेका छन् । तर, यसपटक फिल्मको प्रचारमा गीतले खासै सहयोग गर्न सकेनन् । ‘फूलको थुँगा हौं कि र सुन्तला’ बोलको गीत अपेक्षित रुपमा सफल हुन सकेनन् । दुबै गीतको अडियो कमजोर हुँदा फिल्मलाई समस्या परेको हो ।

यो मितिमा साउथको बहुप्रतिक्षित फिल्म ‘केजीएफ २’ पनि रिलिज हुने भएकाले ‘ए मेरो हजुर ४’ निर्माताको ढुकढुकी बढिरहेको छ । यो फिल्म रिलिज हुँदैन कि भन्ने आशामा नेपाली निर्माता छन् ।

यसैले, अब फिल्मको ट्रेलर बलियो आउनुपर्छ । ट्रेलर पनि गीत जस्तै भयो भने फिल्मको व्यापारमा असर गर्ने निश्चित छ ।

फागुण १३ गते रिलिज भएको ‘म यस्तो गीत गाउँछु २’लाई बलिउड फिल्म ‘गांगुबाई काठियावाडी’ले असर गरेको ‘ए मेरो हजुर ४’का निर्माताले विर्सन हुँदैन । यस्तो अवस्थामा व्यापारमा सुनामी नै ल्याउने आशा गरिएको ‘केजीएफ २’सँग भिड्नका लागि ‘ए मेरो हजुर ४’का निर्माताले सानोतिनो योजना बनाएर हुँदैन ।

झरना थापाको निर्देशनमा तयार भएको फिल्ममा अनमोल केसी, सुहाना थापा, सलोन बस्नेतको मुख्य भूमिका छ ।