माओवादी चेतावनीपछि ‘पीर’बाट हट्यो देह व्यापारको दृश्य

एक सातामै एक करोड भ्यूज बटुल्दै नयाँ रेकर्ड राखेको गायक प्रकाश सपुतको सुपरहिट गीत ‘पीर’लाई युट्युबबाट हटाएर फेरि अपलोड गरिएको छ ।

यो गीत सार्वजनिक भएपछि गायक सपुतलाई समर्थन र विरोध दुबै भएको थियो । माओवादी जनयुद्धका क्रममा घाइते भएका लडाकुको कथामा यो भिडियो बनेको छ । भिडियोको एक दृश्यमा माओवादीकी पूर्व लडाकु जीवन धान्नका लागि देह व्यापारमा लागेको देखाइएको छ । यो दृश्यमा माओवादीका नेताहरुले सबैभन्दा बढी आपत्ती जनाउँदै गीत हटाउन चेतावनी दिएका थिए ।

गायक सपुतले एक सातापछि गीत हटाएर देह व्यापारको दृश्य हटाएर नयाँ दृश्य राख्दै भिडियो अपलोड गरेका छन् । प्रकाश सपुतको स्वर, शब्द तथा संगीतमा तयार भएको भिडियोमा प्रकाश र सुरक्षा पन्तको मुख्य भूमिका छ ।