पुष्पलाई प्रश्न–‘पल नहुँदा तपाइको व्यस्तता बढेको हो’

नायक तथा मोडल पल शाहले एक महिनामा करिब २० वटा म्युजिक भिडियोमा अभिनय गर्ने गरेका थिए । उनका लागि महिनौ कुर्न पनि भिडियोका मेकर तयार थिए । पलले डेढ लाख सम्म पारिश्रमिक लिएर भिडियोमा काम गरिरहेका थिए । तर, विगत २ सातादेखि पल प्रहरीको हिरासतमा छन् । पल प्रहरीको हिरासतमा रहँदा भिडियोको निर्माण पनि घटेको छ ।

तर, पलका लागि कुरेका धेरै मेकरले अन्य कलाकारसँग काम गर्न थालेका छन् । योसँगै पुष्प खड्का, आकाश श्रेष्ठ लगायतका नायकहरुको व्यस्तता बढेको चर्चा हुने गरेको छ ।

नायक पुष्प खड्काले यो कुरालाई आंशिक रुपमा स्विकार गर्न सकिने बताए । उनले भने–‘म पहिले पनि निक्कै व्यस्त थिएँ । तर, यो कुरालाई केही हदसम्म मात्र स्विकार गर्न सकिन्छ । तर, पूर्ण रुपमा यो कुरा सत्य भने होइन ।’

अहिले पुष्प सर्वाधिक व्यस्त छन् । पुष्पको व्यस्तता भिडियोमा मात्र नभएर फिल्ममा पनि उस्तै छ । पुष्पले यदि कुनै मेकरले तोकिएकै कलाकार लिन्छु भनेर सोच्यो भने केही महिना पनि कुरेको उदाहरण रहेको प्रष्ट पारे ।