एलिजाको ‘घुइँचो’मा फाइनल भएका थिए पल

मोडल कुन्साङ बोमजम र नायिका एलिजा गौतमको मुख्य भूमिका रहनेगरी चलचित्र ‘घुइँचो’को घोषणा भयो । तर, चलचित्रको छायांकन अहिलेसम्म सुरु हुन सकेको छैन । यो चलचित्र अब बन्छ या बन्दैन भन्ने पनि पक्का छैन । यो चलचित्रबाट कुन्साङ बाहिरिएको खबर केही दिन अगाडि मेरो फिल्मले सार्वजनिक गरेको थियो ।

चलचित्रबाट कुन्साङ बाहिरिएसँगै नायक पल शाहले यो चलचित्र साइन गरेका थिए । पलसँग एलिजाका श्रीमान् ऋषि धमलाले केही चरण कुराकानी गरेका थिए । ऋषिसँग कुराकानी गरेपछि पलले चलचित्र साइन गरे । तर, चलचित्र पलले साइन गरेको केही समयमै उनी प्रहरी हिरासतमा छन् । अब, यो चलचित्र के हुन्छ कुनै टुंगो छैन ।

दीपेन्द्र लामाको निर्देशनमा तयार हुन लागेको चलचित्रको नाम पनि परिवर्तन गर्ने तयारी निर्माणपक्षको थियो । योसँगै कथावस्तु पनि परिवर्तन गरिएको थियो । एलिजाले म्युजिक भिडियोमा पलसँग काम गरेपनि चलचित्रमा भने काम गरेकी थिइनन् । तर, यसपटक पनि पलसँग काम गर्ने उनको चाहना पुरा हुन्छ या हुदैन भन्न सकिने अवस्था छैन ।

नायिका एलिजा गौतमले पनि चलचित्रमा पल फाइनल भएको स्विकार गरेकी छिन् ।