‘२ नम्बरी’मा पलको ठाउँमा सौगात मल्लको इन्ट्री

चैत्रको १५ गतेबाट छायांकनमा जान लागेको फिल्म ‘२ नम्बरी’मा नायक सौगात मल्लको इन्ट्री भएको छ । २ बर्ष अगाडि शुभसाइत गरेर छायांकन सुरु गर्दा फिल्ममा नायक पल शाहको मुख्य भूमिका थियो । तर, फिल्मको छायांकन भैरहँदा कोरोना महामारीका कारण काम अगाडि बढ्न सकेन । २ बर्षपछि फिल्मलाई फेरि सुरुबाट नै खिच्ने तयारी गरिएको छ ।

नायक पल शाह यतिबेला प्रहरी हिरासतमा रहेकाले निर्माण टिमले उनको ठाउँमा नायक सौगात मल्ललाई अनुवन्धित गरेको हो । सौगात मल्ल अनुवन्धित भएसँगै फिल्मको मुख्य कलाकारको लाइनअप पुरा भएको छ ।

फिल्मलाई दीपेन्द्र लामाले निर्देशन गर्दैछन् । फिल्ममा दयाहाङ राई, सौगात मल्ल, वर्षा राउत, उगेन छोदेन लगायतका कलाकारको मुख्य भूमिका रहनेछ । फिल्मले २ साथीको मित्रताको कथा भन्नेछ । सौगात मल्लको प्रवेशसँगै निर्माणपक्षले यसको प्रदर्शन मिति पनि तय गरेको छ । फिल्मलाई कार्तिक ४ गते तिहारको अवसरमा प्रदर्शन गरिने प्रस्तुतकर्ता किरण नेपालीले जानकारी दिए ।

फिल्ममा दीपक मनाङ्गे र अमला देवी राईको लगानी छ । फिल्मका कार्यकारी निर्माता सरोज नेपाली हुन् ।