‘राधे श्याम’ फ्लप हुँदा बक्स अफिसमा चम्किएको ‘द कश्मीर फाइल्स’

चलचित्र उत्कृष्ट बन्यो भने दर्शकको वर्ड अफ माउथले पनि बम्पर कमाई गर्न सक्छ भन्ने उदाहरण बनेको छ, शुक्रबारदेखि रिलिजमा आएको हिन्दी चलचित्र ‘द कश्मीर फाइल्स’ ।

यो चलचित्रले शुक्रबार ३.५५ करोडको मात्र कारोबार गरेको थियो । तर, चलचित्रको कथावस्तुलाई दर्शकले मन पराएपछि बक्स अफिसमा उछाल नै आएको छ । चलचित्र ३ दिनमा सुपरहिट भैसकेको छ ।

विवेक अग्नीहोत्रीले निर्देशन गरेको यो चलचित्रमा अनुप खेर, दर्शन कुमार, मिथुन चक्रवर्ती, पल्लवी जोशी लगायतका कलाकारको अभिनय छ । यो चलचित्रले कश्मीर विद्रोहको समयमा कश्मीरी पण्डितहरुको पलायनको कथा भनेको छ ।

शनिबार यो चलचित्रको व्यापार ८.५० करोडमा पुग्यो । आइतबार बक्स अफिसमा नयाँ उछाल कायम गर्दै चलचित्रले १५.१० करोडको व्यापार गरेको छ । तीन दिनमा २७.१५ करोडको व्यापार गरेको यो चलचित्रले सय करोड माथिको कारोबार गर्ने बलिउड पण्डितहरुको भनाई छ ।

बक्स अफिसमा साउथ सुपरस्टार प्रभाषको ‘राधे श्याम’लाई दर्शकले रुची नदेखाउँदा ‘कश्मीर फाइल्स’ले भने नयाँ रेकर्ड राखिरहेको छ ।