दिवंगत अभिनेता ऋषि कपूरको अन्तिम फिल्म ‘शर्माजी नमकीन’ ३१ मार्चमा

दिवंगत अभिनेता ऋषि कपूरको अन्तिम फिल्म ‘शर्माजी नमकीन’ को प्रदर्शन मिति घोषणा गरिएको छ । निर्माताले फिल्मको २ नयाँ पोस्टर सामाजिक सञ्जालमा सेयर गरेका छन् ।

पोस्टरमा फिल्म मार्च ३१ मा ओटीटी प्लेटफर्म अमेजन प्राइम भिडियोमा स्ट्रिम हुने बताईएको छ । हितेश भाटियाले निर्देशन गरेको यस फिल्ममा स्वर्गीय ऋषि कपुर बाहेक परेश रावल, जुही चावला, सुहेल नय्यर, तारुक रैना, सतीश कौशिक, शीबा चड्ढा र ईशा तलवारको मुख्य भूमिका रहेको छ ।

यो फिल्मको आधा सुटिङ सकिएपछि ३० अप्रिल २०२० मा ऋषि कपूरको निधन भएको थियो । उनको निधनपछि परेश रावलले उनको भूमिका निर्वाह गर्दै फिल्मको बाँकी छायांकन पूरा गरेका थिए ।