‘हेल्लो जिन्दगी’ ट्रेलर सार्वजनिक, प्रियंका, दीपीका, एभरेष्ट सूर्य र विल्सन बिक्रमको मुख्य भूमिका

फिल्म ‘हेल्लो जिन्दगी’को ट्रेलर सार्वजनिक भएको छ ।

एभरेष्ट सूर्य बोहराको लेखन तथा निर्देशन रहेको यो फिल्म आगामी चैत्र ११ गते देशब्यापी प्रदर्शनमा आउन लागेको छ । सत्य घटनामा आधारित यस फिल्ममा बिक्रम डि. जोशी, प्रियंका कार्की, दीपीका प्रसाईं, एभरेष्ट सूर्य बोहरा, विल्सन बिक्रम राई, बिक्रान्त बस्नेत, सबिता गुरुङ, सनमकुमार बैराग, जानकी पन्त (जुन), ध्रुव दत्त, कुमुद पन्तलगायत कलाकारको अभिनय रहेको छ ।

यूके र नेपालमा छायांकन गरिएको फिल्मको निर्मातामा हिराल जोशी र बिक्रम डि जोशी छन् । सृजना जोशी महर्जन कार्यकारी निर्माता रहेको यस फिल्मको कथा निर्देशक बोहरा र बिक्रम डि जोशीको हो भने पटकथा र संवादमा निर्देशक बोहरालाई अभिमन्यू निरवीले साथ दिएका छन् ।

निर्देशक बोहराकै शब्द रहेको फिल्मका गीतमा राजनराज शिवाकोटी र एलिस कार्कीको संगीत छ । प्रमोद खरेल, प्रताप दास, प्रबिशा अधिकारी, एड्रिन प्रधान र रजिना रिमालको स्वरमा रहेका गीतमा बिष्णु देवाको कोरियोग्राफी छ ।

आरआर फिल्मस्ले बितरण गर्ने फिल्मको डिजिटल राइटस् ओएसआर डिजिटलले लिएको छ । यूकेमा रहेतापनि सधै नेपाली फिल्मको विकास, बिस्तार र गुणस्तरीयता बृद्धिका लागि कटिबद्ध अभिनेता तथा निर्माता बिक्रम डि जोशीले ‘हेल्लो जिन्दगी’ले नेपाली फिल्मको श्रीबृद्धिमा नौलो आयाम थप्ने विश्वास ब्यक्त गरेका छन् ।

महारानी इन्टरटेन्मेन्ट यूके र एभरेष्ट सूर्य बोहरा फिल्मस्सँगको सहकार्यमा बीरञ्जना इन्टरटेन्मेन्टले हेल्लो जिन्दगीलाई प्रस्तुत गरेको हो । पुरुषोत्तम प्रधानले खिचेको यस फिल्मको सम्पादन मित्र डि. गुरुङले गरेका हुन् । कोरोना महामारीका कारण सुस्ताएको नेपाली फिल्म क्षेत्रको विश्वब्यापी बजारलाई आफ्नो फिल्मले नयाँ उचाईमा पुर्याउने विश्वास निर्देशक बोहराले गरेका छन् ।