फिल्म ‘म’ आगामी जेठ २० गते प्रदर्शन हुने

फिल्म सम्बन्धी अध्ययन गराउँदै आएको कान्तिपुर फिल्म एकेडेमीले पहिलो पटक निर्माण गरेको फिल्म ‘म’ को २०७९ जेठ २० गते प्रदर्शन मिति तोकिएको छ । हुन त, यसअघि पनि यही नाममा फिल्मको छायांकन नभएको भने होइन । फिल्मको काम नै भताभुङ्ग भएपछि एकेडेमीले कलाकार र प्राविधिक टिम नै परिवर्तन गरेर ‘म’ बनाएको हो ।

एकेडेमीका प्रमुख प्रकाश पुरीले वितरक कम्पनीहरु डिसिएन र एफडीसँग प्रदर्शनको सम्झौता गरेका छन् । आगामी बर्ष २०७९ जेष्ठ २० गते बाट डिसिएनले काठमाडौं उपत्यका तथा एफडीले उपत्यका बाहिर फिल्म प्रदर्शन गर्नेछन् ।

‘म’को निर्देशन समिक्षात्मक रुपमा सफल फिल्म ‘सुनगाभा’का निर्देशक सुर्वण थापाले गरेका छन् । यस फिल्मको कथा कान्तिपुर फिल्म एकेडेमीका सिइओ समेत रहेका प्रकाश पुरीले लेखेका हुन् । फिल्ममा निराजन प्रधान, सरोज खनाल, सरिता लामिछाने, निशा अधिकारी, सविन श्रेष्ठ, रुविना थापाको मुख्य भूमिका रहेको छ ।

फिल्मका निर्माता बिमला हुमागाईं र पदम पुरी हुन् । तेन्जीङ्ग पाल्देनको छायांकन रहेको यस फिल्मको सम्पादन बनिस शाहले गरेका छन् ।