दुई फिल्म विवाद: ‘म यस्तो गीत गाउँछु २’ लाई सोलो प्रर्दशन हुने, ‘लप्पन छप्पन २’ प्रदर्शन मिति पोष्टपोण्ड !

‘लप्पन छप्पन २’ले घोषणा गरेको प्रदर्शन मितिमा ‘म यस्तो गीत गाउँछु २’ ले प्रदर्शन हुने घोषणा गरेपछि दुई फिल्म आमने सामने भएका हुन् । दुई निर्माताबीच चलचित्र संघमा भएको छलफलमा संघले ‘म यस्तो गीत गाउँछु २’को पक्ष लिएको थियो ।

संघका महासचिव अशोक शर्माले प्रचार प्रसारमा लाखौँ खर्च गरिसकेपछि महामारीका कारण सर्न बाध्य भएका कारण ‘म यस्तो गीत गाउँछु २’लाई प्राथमिकता दिनुपर्ने तर्क गरेका थिए । यसमा ‘लप्पन छप्पन २’का निर्माता सहमत नहुँदा नहुँदै पनि संघले ‘म यस्तो गीत गाउँछु २’को पक्षमा निर्णय गरेको थियो ।

तर निर्णयमा असहमति जनाउँदै ‘लप्पन छप्पन २’ निर्माता निर्मल कुमार मिश्रले चलचित्र संघलाई अनुरोध गरेको पत्रमा आफूहरूले लकडाउन अघि नै प्रदर्शन मिति घोषणा गरेको र संघमा पनि यसको जानकारी दिइसकेको हुनाले पूर्व निर्धारित मितिमा नै फिल्म प्रदर्शन गर्ने अनुमति दिन आग्रह गरेका थिए ।

लप्पन छप्पन २’ दोस्रो लकडाउन सकिएर अवस्था सामान्य भएसँगै फागुन १३ लाई प्रदर्शन मिति घोषणा गरेको थियो । पछि यही मितिमा ‘प्रेमगीत ३’ पनि सार्वजनिक हुने घोषणा गरेको थियो । तर कोभिडको तेस्रो लहर आएसँगै ‘प्रेमगीत ३’ले प्रदर्शन हुने घोषणा फिर्ता लिएको थियो ।  आगामी फागुन १३ लाई प्रदर्शन मिति तय गरेको फिल्म ‘लप्पन छप्पन २’ अन्तत उक्त मितिमा प्रदर्शन नहुने भएको छ । फिल्म ‘म यस्तो गीत गाउँछु २’ निर्माण टिमले उक्त मितिमा आफ्नो फिल्मको प्रर्दशन मिति तोकेर प्रचार थालेपछि आपत्ति जनाएको ‘लप्पन छप्पन २’ टिम मिति हेरफेरको लागि तयार भएको छ ।

अब भने यो फिल्मको नयाँ प्रदर्शन मिति तय गर्नमा निर्माण टिम छलफलमा जुटीसकेको छ । यो फिल्मको नयाँप्रर्दशन मिति घोषणा आइतबार हुने बताइएको छ ।

सुदर्शन थापाले निर्देशन गरेको फिल्म ‘म यस्तो गीत गाउँछु २’मा पल शाह र पूजा शर्मा मुख्य भूमिकामा छन् भने मुकुन्द भट्ट निर्देशित ‘लप्पन छप्पन २’मा सौगात मल्ल, अनुपबिक्रम शाही, अर्पण थापा , शिव श्रेष्ठ मुख्य भूमिकामा रहेका छन् ।