निराजन र रुविना मुख्य भूमिका रहेको फिल्म ‘म’को छायांकन सम्पन्न

फिल्म सम्बन्धी अध्ययन गराउँदै आएको कान्तिपुर फिल्म एकेडेमीले पहिलो पटक निर्माण गरेको फिल्म ‘म’ को छायाकंन सम्पन्न भएको छ।

हुन त, यसअघि पनि यही नाममा फिल्मको छायांकन नभएको भने होइन । तर, लकडाउनका कारण फिल्मको काम नै भताभुङ्ग भएपछि एकेडेमीले कलाकार र प्राविधिक टिम नै परिवर्तन गरेर फिल्म ‘म’ बनाएको हो ।

फिल्म ‘म’को छायांकन आज सम्पन्न भएको हामीलाई यसै फिल्मका कलाकार निराजन प्रधानले जानकारी दिए। यो फिल्मलाई सुवर्ण थापाले निर्देशन गरेका हुन् । फिल्ममा एकेडेमीकै सीईओ प्रकाश पुरीको लेखन रहेको छ ।

फिल्ममा निराजन प्रधान, सरोज खनाल, सरिता लामिछाने, निशा अधिकारी, सविन श्रेष्ठ, रुविना थापाको मुख्य भूमिका रहेको छ ।

फिल्ममा वनिष शाहको सम्पादन, तेञ्जिन पाल्देनले छायांकन गरेका हुन् । यस फिल्ममा निर्देशक थापालाई प्रमुख सहायक निर्देशकको रुपमा आकाश उखेडाले साथ दिएका छन् ।