मोटरसाइकल दुर्घटनामा कलाकार शोभाखर पन्थको निधन

मोटरसाइकल दुर्घटनामा परि कलाकार शोभाखर पन्थको निधन भएको छ । बुटवलको योगिकुटीदेखी मगरघाटतिर जांदै गर्दा सडक र बिद्युत बिस्तारका लागि खनिएको खाल्डोमा परेर उनको मृत्यु भएको लुम्बिनी प्रदेश ट्राफिक प्रहरी कार्यालय बुटवलले जनाएको छ ।

लामो समयदेखि फोटोग्राफर र कला क्षेत्रमा क्रियाशील पन्थ सवार लु ७० प १३५३ मोटरसाइकल शनिबार राति सडकमा खनिएको खाल्डोमा खसेको प्रहरीले जनाएको छ। उनले दर्जनाैँ गीत छायाँकन तथा अभिनय समेत गरेका छन् ।

उनी सवार मोटरसाइकल गएराती सो खाल्डोमा खसेको र बिहान मनिङ वाकमा हिड्ने स्थानीयले देखेपछि प्रहरीलाइ खबर गरेका थिए । उनलाइ आज बिहान प्रहरीले उद्धार गरेर अस्पताल पुर्याएको हो ।

स्थानीयको खबरपछि गएको प्रहरीले उनलाई उद्धार गरेर अस्पताल पुर्याए पनि उनलाई बचाउन नसकिएको बुटवल ट्राफिक प्रहरीले जनाएको छ।

गुल्मी घर भए पनि पछिल्लो समय रुपन्देहीको सैनामैनामा बस्दै आएका पन्थले दर्जनौं गीत छायांकन तथा अभिनयसमेत गरेका छन्। उनका श्रीमती १ सन्तान छन् ।

उनको शव लुम्बिनी प्रादेशिक अस्पतालमा राखिएको ट्राफिक प्रहरी कार्यालय बुटवलले जानकारी दिएको छ ।