‘कमेडी च्याम्पियन’ दुई सिजनका विजेता टोली दुबई उड्यो

नेपालकै पहिलो कमेडी रियालिटी शो कमेडी च्याम्पियन’ दुई सिजनका विजेता र अन्य प्रतिस्पर्धीहरु दुबईमा आयोजना हुने कार्यक्रममा सहभागी हुन बिहीबार त्यस क्षेत्र प्रस्थान गरेका छन् ।

कमेडी च्याम्पियन पहिलो सिजनका विजेता हिमेश पन्त, पहिलो सिजनका फस्ट रनरअप सुमन कोइराला र अर्का प्रतिस्पर्धी सुमन कार्की, दोस्रो सिजनका विजेता भरतमणि पौडेलसँगै फस्ट रनरअप विक्की अग्रवाल र सेकेन्ड रनरअप सन्तोष थापा दुबई उडेका हुन् ।

अंग्रेजी नयाँ वर्षको अवसर पारेर डिसेम्बर ३१ मा आयोजना हुन लागेको कार्यक्रममा सहभागी हुन उनीहरु दुबई उडेका हुन् ।

डिसेम्बर ३१ मा एस्टोरिया होटल बर दुबईको क्लब याक एण्ड यति एभरेष्टमा कार्यक्रम आयोजना हुँदैछ । कार्यक्रममा ‘कमेडी च्याम्पियन’का निर्देशक विशाल भण्डारी विशेष अतिथिका रुपमा रहनेछन् । उनीहरुको साथमा गायक शिव हमाल र गायिकाद्वय समीक्षा अधिकारी र प्राश्ना पाण्डेको सांगीतिक प्रस्तुति समेत दर्शकले हेर्न पाउनेछन् ।

कान्तिपुर होलिडे डट कमको प्रस्तुतिमा ‘कमेडी च्याम्पियन इन दुबई’ कार्यक्रम आयोजना हुन लागेको हो ।