क्रिसमस मनाउन फार्महाउस पुगेका सलमानलाई सर्पले टोक्यो

बलिउड अभिनेता सलमान खानलाई शनिबार सर्पले टोकेको छ । उनलाई मुम्बईस्थिति कमोठे इलाकास्थित एक अस्पतालमा बिहानै ३ बजे भर्ना गरियो ।

आज विहान उनको पनवेलमा रहेको फार्महाउसमा विषरहित सर्पले टोकेको भारतीय सञ्चारमाध्यम टाइम्स अफ इन्डियाले लेखेको छ ।

उपचारपछि उनलाई डिस्चार्ज गरिएको छ । सलमान आफ्नो परिवारसँग शुक्रबार राती पनवेलस्थित आफ्नो फार्म हाउसमा क्रिसमस मनाउन गएका थिए ।

उपचारपश्चात अभिनेता पुनः आइतबार बिहान ९ बजे आफ्नो फार्म हाउस फर्किए । हाल उनको स्वास्थ्य स्थिति ठिक भएको बताइएको छ ।

सर्पले सलमानको हातमा टोेकेको जनाइएको छ । अहिले उनको अवस्था सामान्य रहेको जनाइएको छ । उनको जन्मदिन नजिकिदैँ गर्दा उक्त घटना घटेको जनाइएको छ ।

पनवेलको जुन इलाकामा सलमानको फार्म हाउस छ, त्यो पहाडी र वन क्षेत्रले घेरिएको छ । यो इलाकामा धेरैजसो सर्प र अजिंगर निस्किन्छन् ।