फेरि सर्‍यो फिल्म ‘चपली हाइट ३’को प्रदर्शन मिति

फेरि सर्यो फिल्म ‘चपली हाइट ३’को प्रदर्शन मिति । पुस २ बाट सारेर १५ गते प्रदर्शन मिति पुर्याएको यो फिल्म अब पुस ३० गते मात्रै रिलिज हुने भएको छ ।

यसअघि पुस २ गतेलाई रिलिज मिति तोकेको यो फिल्मले हलिउड फिल्म ‘स्पाइडर म्यानः नो वे होम’ र साउथ इण्डियन फिल्म ‘पुष्पा’का कारण १५ गतेलाई प्रदर्शन मिति तोकेको थियो ।

एउटा नेपाली फिल्म हलमा रिलिज भएको दुई सातासम्म अर्को नेपाली फिल्म रिलिज गर्न पाइने नियमको उल्लंघन भएको भन्दै ‘चपली हाइट ३’लाई पछि सार्न दबाब बढिरहेको थियो ।

फिल्म ‘कठपुतली’ले शुरुमा नै पुस १६ गतेलाई रिलिज मिति तोकिसकेको अवस्थामा ‘चपली हाइट ३’ जुध्न आइपुगेको थियो । आइतबार दिउँसो नेपाल चलचित्र संघको कार्यालयमा चलचित्र विकास बोर्ड, चलचित्र संघ र फिल्म ‘चपली हाइट ३’ निर्माणपक्षबीच भएको छलफलमा निर्माता अर्जुन कुमार आफ्नो फिल्मको रिलिज पछि सार्न तयार भएका हुन् ।

यदि यो फिल्मको प्रदर्शन मिति नसरेको खण्डमा अन्य नियम समेत लागू नगर्ने चेतावनी हल सञ्चालकहरुले दिइरहेका थिए । फिल्मको ट्रेलर बजाएको रकम नलिने, हलमा पोष्टर राखेको रकम नलिने, पहिलो सातामा नेपाली फिल्मले ५५ प्रतिशत शेयर र बाँकी हप्तादेखि ५० प्रतिशत शेयर पाउने नियम पनि चलचित्र संघले बनाएको थियो ।

फिल्म अर्जुनकुमारले निर्माण गरेका हुन्। निकेश खड्काको निर्देशन रहेको फिल्म क्राइम थ्रिलर जनरामा निर्माण भएको हो। फिल्ममा स्वस्तिमा खड्का, आमिर गौतम, सुपुष्पा भट्ट, महेश त्रिपाठी, प्रतिकमान श्रेष्ठ, अर्पण थापालगायतका कलाकारको मुख्य भूमिका रहेको छ। दीपाश्री निरौला, लक्ष्मी वर्देवा, लोकेन्द्र लेखक, विशाल पहारी, जीवन भट्टराई, सुष्मा निरौलाको समेत अभिनय फिल्ममा देख्न सकिन्छ।

कथा तथा संवाद आकाश बरालको रहेको फिल्ममा ‘स्टेशन फाइभ’ ले उपत्यका र ‘एफडी कम्पनी’ ले उपत्यका बाहिर वितरण गर्दैछन्।