‘कबड्डी ४’को टिजर सार्वजनिक सँगै प्रदर्शन मिति घोषणा

रामबाबु गुरुङको निर्देशनमा तयार भएको फिल्म ‘कबड्डी ४’को टिजर सार्वजनिक भएको छ । टिजरसँगै फिल्मको प्रदर्शन मिति समेत घोषणा गरिएको छ ।

‘कबड्डी ४ : द फाइनल म्याच’ २०७९ सालको वैशाख २३ गतेबाट रिलिज हुने टिजरमा उल्लेख गरिएको छ ।

बाँसुरी फिल्मस्को प्रस्तुतिमा तयार भएको यो फिल्ममा दयाहाङ राई, सौगात मल्ल, मिरुना मगर, गौमाया गुरुङ, बुद्धि तामाङ, विजय बराल, कमलमणि नेपाल, पुष्कर गुरुङ, कविता आले, जयनन्द लामा, प्रकाश घिमिरे, माओत्से गुरुङ, शरद अधिकारी लगायतका कलाकारको अभिनय छ ।

फिल्ममा शैलेन्द्र डी कार्कीको छायांकन, निमेष श्रेष्ठको सम्पादन, कालीप्रसाद बाँस्कोटा, एसडी योगी, अनुपम शर्माको संगीत, रामबाबु गुरुङ र उपेन्द्र सुब्बाको लेखन छ ।

फिल्मको टिजरमा दयाहाङ राई र मिरुना मगरको प्रेममा सौगात मल्लको प्रवेशलाई रोचक तरिकाले प्रस्तुत गरिएको छ ।

यस अघि ‘कबड्डी’का अघिल्ला तीनवटा सिरिज ब्लकबस्टर भएका थिए । चफिल्ममा विशाल गुरुङ, सुष्मा गुरुङ, मधु मिजार र मणिराम पोखरेलको लगानी रहेको छ ।