तिहारमा ‘धूम-४’, नआउने भयो ‘चोर र पुलिस’

काठमाडौं- आज लक्ष्मी पुजाको दिन देशभर ‘धूम-४’ लागिरहेको छ । कोभिडका कारण झन्डै डेढ वर्ष बन्द रहेको सिनेमा घर क्रमशः खुल्दै गइरहेको अवस्थामा दसैंमा ‘धन्दागिरी’ र ‘डाँडाको वरपीपल’ गरी दुईवटा नेपाली फिल्म प्रदर्शन भएका थिए । दुवै फिल्मले दर्शकको साथ पाएनन् । तिहारमा हिन्दी फिल्म ‘सूर्यवंशी’ प्रदर्शन हुने तयारीमा छ । अधिकांश नेपाली निर्माताहरू ‘सूर्यवंशी’ को व्यापार हेरेर मात्रै आफ्नो फिल्म प्रदर्शन गर्ने दाउमा छन् । तर, निर्माता जयकिशन बस्नेतले आफ्नो फिल्म ‘धूम-४’ ‘सूर्यवंशी’ भन्दा एक दिन अगाडि अर्थात् १८ कात्तिकमा प्रदर्शन गर्दैछन् । जयकिशनकै निर्माण, निर्देशन र अभिनय रहेको फिल्मका अन्य कलाकारमा जाहान्वी बस्नेत, संजोग राणा लगायतले अभिनय गरेका छन् ।