मुम्बई(बीबीसी)- बलिउड अभिनेता शाहरुख खानका छोरा आर्यन खानमाथि चलिरहेको लागुऔषध मामलामा नार्कोटिक्स कन्ट्रोल ब्युरो(एनसीबी)ले स्वतन्त्र साक्षी किरण गोसावीलाई पुणे सिटी प्रहरीले पक्राउ गरेको छ । किरण गोसावी निजी(स्वघोषित) जासूस हुन् र आर्यन मामलामा एनसीबीले उनलाई स्वतन्त्र साक्षी बनाएको थियो । गोसावीलाई पुणे प्रहरीले सन् २०१८ को एक धोखाधडी मुद्धामा पक्राउ गरेको हो । आर्यन पक्राउ परेपछि आर्यनसँग किरणको एक सेल्फी तस्वीर सामाजिक सञ्जालमा भाइरल भएको थियो । यो सेल्फी पछि किरणको अवस्था अज्ञात थियो ।
यो तस्वीरपछि आर्यन मामलामा किरणको भूमिकालाई लिएर प्रश्न उठिरहेको थियो । उनी उत्तर प्रदेशमा रहेको र उनले यूपी प्रहरीसँग आत्मसमर्पण गर्ने कुरा गरेको खुल्न आएको थियो । यद्यपि बुधबार उनी पुणे गए र उनले समाचार च्यानलसँग आफू मुम्बईमा एनसीबी अधिकारीहरु समक्ष पेश हुने जानकारी दिएका थिए । एनसीबीको रेडमा किरणको सहभागिता लिएर प्रश्न उठेको थियो । पुणेमा कस्बा पीठ इलाकाको चिन्मय देशमुखले किरणविरुद्ध सन् २०१८, मे २९ मा फरास्खाना प्रहरी स्टेसनमा एफआईआर दर्ता गराएका थिए । एफआईआरअनुसार गोसावीले सामाजिक सञ्जालमा होटल मेनेजमेन्टको जागिरका लागि विज्ञापन पोस्ट गरेका थिए र देशमुख यही जागिरको लागि उनको सम्पर्कमा आएका थिए ।
देशमुखका अनुसार किरणले देशमुखलाई मलेशियामा जागिर लगाइदिने आश्वासन दिएका थिए । जसको बदलामा आफ्नो खातामा ३ लाख ९ हजार रुपैंयाँ पठाउन भनेका थिए । तर किरणले पैसा त लिए, देशमुखले जागिर पाएनन् । देशमुखले किरणलाई पैसा माग्दा पैसा पनि फिर्ता दिएनन् । त्यहीकारण किरणविरुद्ध प्रहरीले आईपीसीको सेक्सन ४१९ र ४२० अनुसार उजुरी दिएका हुन् ।
अक्टोबर १३ मा पुणे सिटी प्रहरीले किरणविरुद्ध लुकआउट नोटिस जारी गरेको थियो ताकि उनी देश छोडेर बाहिर जान नसकुन् । यसै महिनाको अक्टोबर १८ मा प्रहरीले शरहबानो कुरैशीलाई मुम्बईको गोवाडीस्थित उनकै निवासमा पक्राउ गरेको थियो । त्यो समयमा बानो किरणको सहायक थिइन् । उनी पक्राउ परेपछि देशमुखको पैसा बानोको खातामा आएको खुलेको थियो ।
प्रतिक्रिया