दीपेन्द्र के. खनाल निर्देशित फिल्म ‘चिसो मान्छे’को प्रदर्शन मिति तोकियो

दीपेन्द्र के खनाल निर्देशित फिल्म ‘चिसो मान्छे’ले प्रदर्शन मिति तोकिएको छ ।

नेपालमा कोभिड १९ संक्रमणको दोस्रो लहरको प्रभाव कम भएसँगै फिल्म हल खुलेपछि गतिविधि बढ्न थालेका छन् । नयाँ फिल्म प्रदर्शनका लागि पनि मिति तय भइरहेका छन् भने निर्माण र घोषणाले पनि गति लिँदैछ । यसैक्रममा आउँदो वर्ष अर्थात ३० वैशाख २०७९ मा फिल्म ‘चिसो मान्छे’ प्रदर्शनमा आउने भएको छ ।

निर्माण पक्षले एक पोष्टर सार्वजनिक गर्दै फिल्मको रिलिज घोषणा गरेको हो । नयाँ वर्षको वैशाख ३० गते फिल्म प्रदर्शनमा आउने गरि मिति तोकिएको ‘चिसो मान्छे’ निर्माण पक्षले जनाएको छ ।

फिल्मको निर्माण शर्मिला पाण्डेले गरेकी छिन् । फिल्ममा अर्पण थापा, स्वस्तिमा खड्का र देशभक्त खनालको मुख्य भुमीका रहेको छ । अहिलेको समाज र समाजमा देखिएका समस्यालाई फिल्ममा देखाइएको छ साथै वैदेशिक रोजगारबाट नेपाली युवाले भोग्दै आएका पिडालाई पनि फिल्ममा देखाइएको छ ।

पशुपति प्रसाद, धनपति र आमाबाट प्रख्याति कमाएका निर्देशक खनालले फिल्मको कथा समेत आफै लेखेका हुन् । फिल्मलाई रीच इन्टरटेनमेन्टसँगै जीजीए ग्रुपले उपत्यकामा र एफडी कम्पनीले मोफसलमा वितरण गर्नेछ ।