भारती जोडीको जमानतमा आपत्ति

मुम्बई- लागुऔषध मामलामा टेलिभिजन होस्ट र कमेडियन भारती सिंह तथा उनका पति हर्ष लिम्बाचियालाई जमानत दिने निर्णय प्रति नारकोटिक्स कन्ट्रोल ब्यूरो (एनसीबी) ले बिहीबार आपत्ति जनाएको छ । उसले मुम्बईको एक सत्र अदालतमा लागुऔषध मामलामा भारतीय र उनका पतिलाई जमानत दिने मजिस्ट्रेट अदालतको आदेश ‘समाजमा खतरनाक संकेत’ साबित हुन सक्ने चेतावनी दिएको छ ।

एनसीबीले अदालतको आदेशले समाजमा हाई प्रोफाइल अपराधी अदालतबाट सजिलै रिहा हुने सन्देश दिएको दाबी गरेको छ । ‘यो निर्णयले हाई प्रोफाइल अपराधीहरु अभियोग पक्षको कुरा नसुनी सजिलै रिहा भइरहने एक खतरनाक संकेत समाजका लागि दिएको छ’, एनसीबीले भनेको छ ।

एनसीबीले गत वर्ष नोभेम्बर १२ मा भारती र हर्षको अँधेरीस्थित घरमा छापा मारेपछि जोडीलाई पक्राउ गरेको थियो । यो जोडीलाई कम मात्रामा मारिजुआना राखेको र नशालु औषधिको सेवन गरेको आरोपमा पक्राउ गरिएको थियो ।

छापामारीमा उनीहरुको घरबाट ८६ दशमलब ५० ग्राम गाजा पनि बरामद गरिएको थियो । यो जोडीले आफूहरु भाङको सेवन गर्ने गरेको स्वीकारेका थिए ।

यो जोडीले पक्राउ पर्नासाथ सेप्टेम्बर २२ मा जमानतका लागि अदालतको ढोका ढकढक्याएका थिए । यो मुद्धालाई एनसीबी र पब्लिक प्रोसिक्यूटरको अदालतमा पेश गरिएको थिएन । जसलाई ध्यानमा राख्दै उनीहरुलाई १५ हजार निजी मुचुल्कामा जमानत दिइएको थियो । (दैनिक जागरण)