‘जी ले जरा’मा प्रियंका , कटरीना र आलिया (भिडियो सहित)

फिल्म ‘दिल चाहता है’ को फिमेल भर्सन निर्माणको घोषणा भएको छ । अभिनेता फरहान अख्तरको एक्सेल इन्टरटेनमेन्टले इन्डस्ट्रीमा २० वर्ष पूरा गरेको अवसरमा सो घोषणा गरेको हो ।

‘जी ले जरा’ नाम दिइएको फिल्ममा प्रियंका चोपडा, कटरीना कैफ र आलिया भट्टको अभिनय रहनेछ । फिल्म रोड ट्रिपमा आधारित हुनेछ । यस अघि फरहानले ‘दिल चाहता है’ र ‘जिन्दगी ना मिलेगी दोबारा’ जस्ता सानदार फिल्म निर्माण गरिसकेका छन् ।

जोया अख्तर, फरहान अख्तर र रीमा कागतीले लेखेको फिल्मलाई रीमा कागती, जोया अख्तर, रितेश सिधवानी र फरहान अख्तरले लगानी गर्नेछन् । अभिनेता फरहान अख्तर आफेले निर्देशन गर्ने फिल्मलाई २०२३ मा रिलिजको लक्ष्य राखिएको छ ।

‘दिल चाहता है’ बाट फरहान अख्तरले १० वर्षपछि फिल्म निर्देशनमा कमब्याक गर्न लागेका हुन् । फिल्म ‘डन २’ पछि उनले निर्देशन छाडेर अभिनयलाई प्राथमिकता दिँदै आएका थिए । उनी अभिनीत फिल्म ‘तूफान’ हालै ओटीटी प्लेटफर्ममा रिलिज भएको थियो । उनको ‘दिल चाहता है’ २० वर्षअघि यहि महिनामा प्रदर्शनमा आएको थियो । जसमा आमिर खान, सैफ अलि खान र अक्षय खन्नाको अभिनय थियो ।