गायिका सुनिता दुलालको नयाँ तिज गीत ‘परदेशी छोरी’

गायिका सुनिता दुलालको नयाँ तिज गीत सार्वजनिक भएको छ । ‘परदेशी छोरी’ बोलको गीतमा सुनिताको स्वर रहेको छ । ज्योती गुरुको शब्द रचना रहेको गीतमा सुरज लामिछानेको संगीत रहेको छ ।

तीज गीतका सन्दर्भमा सुनिता ‘चुजी’ गायिकाको रुपमा पर्छिन् । वर्षमा एउटा मात्रै तीज गीत गाउने सुनिताका गीत अरुका भन्दा फरक हुन्छन् । उनका हरेक गीतमा तीजका केही मौलिकता समेटिएका हुन्छन् । यस अर्थमा ‘परदेशी छोरी’ पनि आम तीज गीत भन्दा फरक छ । परदेशिएकी छोरीले तिजको समय घर सम्झिएको प्रसंग गीतमा समेटिएको छ ।

एउटा समय थियो । छोरी चेली विवाह गरेपछि माइती भन्दा टाढाको गाउँमा पुग्थे । कुनै कारण तीजमा माइत जान पाएनन् भने माइत जाँन नपाउदाको पीडा गीत मार्फत व्यक्त गर्थे ।

अहिले सन्दर्भ थोरै फरक छ । चेलीहरुले हिजो जस्तै सासुको कहर र नन्द आमाजुको टोकेसो सहनु पर्दैन । तर, घरबाट टाढै हुन्छन् । फरक यत्ति हो हिजो गाउँ फरक हुन्थ्यो भने देशै फरक हुन थालेको छ । आजका चेलीहरु सिमा पार गरेर कर्म गर्न निस्कन थालेका छन् ।

जतिसुकै सम्पन्न शहरमा स्थापित भए पनि नेपाली महिलाहरु आफ्ना रित र परम्परा भुल्न सक्दैनन् । तीज, दसैं, तिहार जस्ता पर्व उनीहरुका लागि उत्तिकै महत्वपूर्ण हुने गर्छ । यसपाली सुनिताले परदेशिएका छोरीहरुका पीडालाई गीत मार्फत व्यक्त गरेकी छिन् । भिडियो पनि उत्कृष्ठ बनेको छ । भिडियो निर्देशन कुशल श्रेष्ठले गरेका छन् ।