सर्ट फिल्म ‘अधूरो प्रेम’ सार्वजनिक

अनन्तप्रसाद तिमिल्सिनाको निर्देशनमा सर्ट फिल्म ‘अधूरो प्रेम’सार्वजनिक भएको छ ।

म्युजिक भिडियो, विज्ञापन तथा फिल्मको प्रोडक्सनमा लामो समयदेखि काम गर्दै आइरहेका तिमिल्सिनाले आफ्नै निर्देशनमा सर्ट फिल्म‘अधूरो प्रेम’यूट्युवमार्फत सार्वजनिक गरेका हुन ।

पानस मिडियाको यूट्युव च्यानलमार्फत भिडियो सार्वजनिक गरिएको हो । उक्त सर्ट फिल्ममा दुई जना पात्रले प्रेमको नयाँ स्वरुपलाई चित्रण गरेका छन् ।

फिल्ममा उपदेश तिमिल्सिना तथा सामिया कार्कीको अभिनय रहेको छ । करिव १७ मिनेट लामो उक्त फिल्म शिशिर कार्कीले लेखेका हुन् । फिल्मका कथाकार पनि कार्की नै हुन् । राजेन्द्र बजगाईंको पृष्ठभूमि संगीतमा रहेको यो फिल्ममा रवि श्रेष्ठको आवाज सुनिन्छ ।

खुशी तिमिल्सिना तथा अरोज तिमिल्सिनाको निर्माणमा तयार भएको यो फिल्मलाई रामकुमार केसीले छायांकन गरेका हुन् भने यस फिल्मको सम्पादन टेकेन्द्र शाहले गरेका हुन् ।