फिल्म ‘तिम्रो मेरो साथ’को डबिङमा पुष्प र साम्राज्ञी

फिल्म ‘तिम्रो मेरो साथ’को डबिङ सुरु भएको छ ।

गत चैतको अन्तिमलाई रिलिज टार्गेट बनाएको फिल्म ‘तिम्रो मेरो साथ’ कोरोनाका कारण रिलिज हुन पाएन । फिल्मको छायांकन सकिए पनि कोरोनाका कारण प्रोडक्सनको काम सुरु हुन सकेको थिएन ।

अहिले फिल्मको प्रोडक्सनको काम सुरु भएको छ । रेड स्टूडियोमा फिल्मको डबिङ सुरु गरिएको निर्माणपक्षले बताएको छ । रमेश एम के पौडेलको निर्देशनमा तयार भएको यो चलचित्रका कार्यकारी निर्माता सविर श्रेष्ठ हुन् ।

फिल्म का लागि मुख्य कलाकारहरु नायक पुष्प खड्का र नायिका साम्राज्ञी राज्यलक्ष्मी शाहले डबिङ गरेका छन् । यो फिल्म मा शिव ढकालको छायांकन, रामजी लामिछानेको नृत्य निर्देशन रहेको छ । यो फिल्मलाई नेपाल भन्दा पहिले अमेरिका, अष्ट्रेलिया, बेलायत लगायतका देशहरुमा प्रदर्शन गरिने निर्माणपक्षले जानकारी दिएको छ ।

नेपालमा भने दशैं र तिहारको विचमा रिलिज गरिनेछ । बोधी एचडी र आर्यन फिल्मस्को ब्यानरमा बनेको यो फिल्ममा पुष्प र साम्राज्ञीको साथमा सरोज खनाल, सन्दिप क्षेत्री, खगेश्वर पुन मगरको अभिनय छ ।