कोरोनाका कारण फेरि ‘मिसन इम्पोसिबल ७’ (एमआई ७) को छायांकन रोकियो

हलिउड अभिनेता टम क्रुजको एक्सन फ्रेन्चाइज फिल्म ‘मिसन इम्पोसिबल ७’ (एमआई ७) को छायांकन रोकिएको छ । छायांकनमा रहेको फिल्मको टिममा कोरोना पोजिटिभ देखिएपछि छायांकन रोकिएको बताइएको छ । पछिल्लोपटक बेलायतमा फिल्मको छायांकन भइरहेको थियो ।
प्यारामाउन्ट र स्काइड्यान्स निर्माण कम्पनीका प्रतिनिधिले फिल्मकर्मीमा कोरोना पोजेटिभ देखिएपछि यही जुन १४ सम्म छायांकन स्थगित गरिएको भेराइटीले उल्लेख गरेको छ । कोरोना महामारीबीच पनि छायांकनमा रहेको टिमको समय–समयमा कोरोना परीक्षण, शरीरको तापक्रम जाँचलगायत सुरक्षाका प्रोटोकल पालना गरी काम भइरहेको थियो ।

अचानक केहि फिल्मकर्मीलाई कोरोनाको लक्षण देखिएपछि फिल्मको छायांकन रोक्नु परेको हो । फिल्मको निर्देशन क्रिस्टोफर म्याक्वेरीले गरिरहेका छन् । उनको यसअघि ‘मिसन ः इम्पोसिबल रोग नेसन’ र ‘फलआउट’ जस्ता फिल्म निर्देशन गरिसकेका छन् ।