‘मैने प्यार किया’ का संगीतकारको निधन

‘मैने प्यार किया’, ‘हम आपके है कौन’ जस्ता थुप्रै हिट फिल्मका संगीतकार विजय पाटिल अर्थात रामलक्ष्मणको निधन भएको छ । उनको हृदयघातका कारण शनिबार निधन भएको हो ।
७९ वर्षिय रामलक्ष्मणको नागपुरमा निधन भएको बलिउड मिडियाले जनाएका छन् । उनको निधनले बलिउडको शोकमा डुबेको भारतिय मिडियाले जनाएका छन् । उनको निधनप्रति चर्चित गायिका लता मंगेशकरले शोक ब्यक्त गर्दै सामाजिक सञ्जालमा लेखेकी छन्, ‘अहिले थाहा भयो कि धेरै गुणवान र लोकप्रिय संगीतकार रामलक्ष्मणको निधन भएको छ । उनी निकै राम्रा मानिस थिए । मैले उनको धेरै गीत गाएकी छु । जुन लोकप्रिय भएका छन् ।’
गायक कुमार सानुले पनि उनको निधनप्रति शोक व्यक्त गरेका छन् । उनले पनि सामाजिक सञ्जालमा लेखेका छन्,‘रामलक्ष्मण मलाई प्रेमले कुमारजी भनेर बोलाउँथे । गीत सिकाउने समय गायकसँग जहिले पनि साथीको जस्तो ब्यवहार गर्दथे । कुनै गीत गाउँदा गाह्रो भए हिम्मत दिन्थे, गाउन सक्छौ भनेर हौसला दिन्थे । उनको यही स्वभावको कारणले सबै कलाकारको प्रिय थिए ।’