कोरोनाका डरले ‘लप्पन छप्पन २’को रिलिज अनिश्चत

फिल्म ‘लप्पन छप्पन २’को रिलिज अनिश्चत कालको लागि सारेको छ । यहि चैत २७ गते रिलिज हुने तयारीमा रहेको फिल्मलाई निर्माण पक्षले अनिश्चित कालका लागि सारेको बताएका छन् । स्वास्थ्य मन्त्रालयले हालै (कोभिड–१९)को जोखिम बढेको भन्दै भीडभाड जन्य बैठक, जुलुस, कार्यक्रम र व्यापार नगर्न विज्ञप्ती निकालेपछि ‘लप्पन छप्पन२’ले रिलिज रोकिएको हो ।

ठुलो लगानीमा बनेको फिल्मलाई विभिन्न भाषाका साथै चिनमा समेत प्रदर्शन गर्ने निर्माण पक्षले बताएको थियो । फिल्मको ट्रेलर रिलिजका क्रममा निर्माण पक्षले फिल्म ठुलो बजेटमा बनेको र यसलाई नेपालीसँगै हिन्दी, तमिल, तेलुगु, भोजपुरी र चाइनिज गरी ६ भाषामा प्रदर्शन गर्ने जनाएको थियो ।
तर, पुन कोरोना फैलिन थालेपछि यस फिल्मका निर्देशक तथा निर्माता मकुन्द भट्टले तोकिएको समयमा फिल्म रिलिज नहुने बताएका छन् । यस फिल्ममा शिव श्रेष्ठ, सौगात मल्ल, अर्पण थापा, अनुपविक्रम शाही, प्रकाश कुँवर, स्व.दीपक क्षेत्री, सरिता गिरी, एञ्जल श्रेष्ठ, अनिल खनाल, राजेन्द्र विष्टलगायतका कलाकारको अभिनय छ । शक्ति श्रेष्ठ, केरोलिन कोलिन्डा, सुपर गुरुङ, आना ढकाल, सृजना सिना, रन्जीत बन्तलगायतले यसै फिल्मबाट डेब्यु गरेका हुन् ।
खिलेन्द्रराज तिम्सिनाको प्रस्तुति रहेको फिल्म ‘लप्पन छप्पन २’ को पटकथा र संवादमा निर्देशक भट्ट र सुनिल नेउरेले लेखेका हुन् । पटकथामा अमित शर्माको पनि सहयोग रहेको छ । फिल्मलाई पुरुषोत्तम प्रधानले खिचेको छन् भने मिलन श्रेष्ठले सम्पादन गरेका छन् ।