‘वीर विक्रम २’ मा दयाहाङको खोजी

गत मंगलवार युटुवमा अपलोड भएको फिल्म ‘वीर विक्रम२’लाई दर्शकले मन पराइदिएका छन्। फिल्म हलमा कमजोर व्यापार गरेको फिल्मलाई युटुवका दर्शकले राम्रो प्रतिक्रिया दिएका हुन्।

दर्शकले फिल्म‘वीर विक्रम’ जस्तो सिक्वेल नभएको बताएका छन्। अभिनेता दयाहाङ राई फिल्ममा नभएको कारण फिल्म पहिलो जस्तो राम्रो नभएको कमेन्ट गरेका छन्। युटुवमा कमेन्टकर्ता अभिनास गुरुङ पहिलो फिल्म जस्तो सिक्वेल नभएको प्रतिक्रिया दिएका छन्। दयाहाङ भएको भए झन् राम्रो हुन्थ्यो भन्ने उनको भनाई छ। उनी जस्ता धेरैले फिल्ममा दयाको खोजि गरेका छन्।

मिलन चाम्सले निर्देशन गरेको फिल्ममा अभिनेता द्वय पल शाह र नाजिर हुसेनसँगै वर्षा सिवाकोटी, बुद्धि तामाङ, देशभक्त खनाल लगायतका कलाकारको अभिनय रहेको छ । फिल्मले समिक्षक हिसावले पनि राम्रो प्रतिक्रिया पाउन सकेको थिएन। युटुवमा भने राम्रो दर्शक पाएको छ।
फिल्म यूटुवमा रिलिज भएको दिन देखि अहिले समाचार तयार पार्दासम्म १६ लाख भन्दा बढी भ्यूज ५७ हजार लाइक्स र ४ हजार बढी कमेन्ट प्राप्त भएको छ ।

४ वर्ष अगाडि प्रदर्शनमा आएको ‘वीर विक्रम’मा अभिनेता दयाहाङ राई, अनुपविक्रम शाही, नाजिर हुसेन, दीया पुनले अभिनय गरेका थिए। जुन फिल्मलाई दर्शकले अत्यधिक मन पराएका थिए। पहिलो फिल्म हिट भएपछि निर्देशक मिलनले दोस्रो सिक्वेल निर्माण गरेका हुन्।