‘माया लुकाई लुक्दैन’का गायक जगतमर्दनको निधन

वरिष्ठ गायक जगतमर्दन थापाको ८५ वर्षको उमेरमा निधन भएको छ । आज बिहान १० बजे थापाथलीस्थित नर्भिक अस्पतालमा उपचारको क्रममा उनको निधन भएको हो ।  गायक जगतमर्दनले वि.सं २०१३ सालबाट रेडियो नेपालबाट सांगीतिक तथा साहित्यिक यात्रा सुरु गरेका थिए।

रेडियो नेपालबाट नै सांगितिक यात्रामा लागेका उनले २०१८ सालमा कोलकाताबाट हिज मास्टर्स भ्वाइसमा ‘माया लुकाई लुक्दैन’ बोलको पहिलो पटक गीत रेकर्ड गराउँदै नेपाली स्रोतामाझ आएका थिए । त्यसपछि उनी लगातार ‘मनको शान्ति’, ‘माया लुकाई लुक्दैन’, ‘म पतझड तिमी मधुमास’ लगायतका एल्बम बजारमा आएका थिए जुन सर्वाधिक चलेका गीतहरुमा पर्दछन् । उनले सञ्चय कोष, कृषि चुन उद्योग जस्ता सरकारी निकायमा काम गरिसकेका छन्।