अजय देवगनका भाइको निधन, अजयले लेखे- परिवार विछिप्त भएको छ

बलिउड अभिनेता अजय देवगनका भाइ अनिल देवगनको सोमबार निधन भएको छ । अनिलको अचानक निधनले अहिले देवगन परिवार शोकमा छ । अनिल ५१ वर्षका थिए । उनको हृदयाघातका कारण निधन भएको बताइएको छ ।

उनको हिजो राती मुम्बईमा निधन भएको हो । यसको बारेमा अभिनेता अजय देवगणले मंगलवार दिउँसो सामाजिक सञ्जाल ट्वीटर मार्फत जानकारी दिएका छन् ।

यो दु:खद खबरको जानकारी दिँदै अजयले आफ्नो सामाजिक सञ्जालमा भाइको एउटा फोटो पोस्ट गर्दै लेखेका छन्,“हिजो राति मैले मेरो भाइ अनिल देवगनलाई गुमाएँ । उनको अचानक निधनले हाम्रो पूरै परिवार विछिप्त भएको छ ।”

अजय थप लेख्छन्,“परिवार र म उसको उपस्थिती याद गर्ने छौं । उनको आत्माको शान्तिका लागि प्रार्थना गर्नुहोस् । महामारीका कारण हामीले पारिवारिक भेटघाट राख्दैनौं ।”

I lost my brother Anil Devgan last night. His untimely demise has left our family heartbroken. ADFF & I will miss his presence dearly. Pray for his soul. Due to the pandemic, we will not have a personal prayer meet? pic.twitter.com/9tti0GX25S

— Ajay Devgn (@ajaydevgn) October 6, 2020

अनिल कुनै समय बलिउडमा आवद्ध थिए । उनी दाई अजयकै कारण चलचित्र क्षेत्रमा प्रवेश गरेका थिए । यद्यपि अजयले जस्तो सफलताको उचाई भने चुम्न सकेनन् ।

सन् १९८९ तिर बलिउडमा अभिनयको यात्रा चालेका उनले सन् २००० मा निर्देशनमा मोडिए । उनले चलचित्र ‘राजु चाचा’, ‘ब्लयाकमेल’, ‘हाल–ए–दिल’मा काम गरेका छन् ।

यसका साथै उनी ‘सन अफ सरदार’ र ‘शिवाय’ का क्रियटिभ निर्देशक पनि थिए ।