कृ फिल्मकी अभिनेत्री अदितीको पञ्जाबी गीत रिलिज

फिल्म ‘कृ’ अभिनेत्री अदिती बुढाथोकीद्धारा अभिनित पञ्जाबी गीतको भिडियो सार्वजनिक भएको छ । पञ्जाबी गायक राहुल खनपानले गाएको ‘रुसिया लग्दानी’ बोलको गीत सार्वजनिक भएको हो । सार्वजनिक भएको गीतको भिडियोमा अदितीले गायक राहुलसँग रोमान्स गरेको देख्न सकिन्छ ।
बलिउडमा अवसर खोजिरहेकी अदिती पञ्जाबी गीतमा पनि अभिनय गरेर आफ्नो कला प्रस्तुत गरेकी हुन् । यूट्युब रिलिजको भिडियोलाई दर्शकले चार दिनमा २० लाख हराहारी हेरिसकेका छन् ।

निर्देशक सुरेन्द्र पौडेलले निर्देशनमा बन्न लागेको नयाँ फिल्मका लागि नेपाल आएकी अदिती लकडाउनका कारण घरमै बसेकी छन् । यो फिल्ममा उनको जोडी गायक नितेशजंग कुँवरसँग बाँधिएको चर्चा छ । तर लकडाउनका कारण फिल्मको छायांकन हुन सकेको छैन ।