नयाँ पुस्ताका निर्देशकसँग करिश्माको असन्तुष्टी

अभिनेत्री करिश्मा मानन्धरले अभिनेता राजेश हमालको महानायक बहस तातेपछि स्टाटस लेखेको लेख्यै छन् । हमालसँग सम्बन्धित भिडियो करिश्माले पोष्ट गरिरहेकी छिन् । करिश्मा अहिलेका पुस्ताका निर्देशकले आफ्नो यूगका सिनेमा र अभिनेता हमालको बिषयमा गरेको टिप्पणीमा खुशी छैनन् । निर्देशक दीपेन्द्र लामाले राजेश हमाल महानायक होइनन् र उनका फिल्म १० मिनेट हेर्न सकिदैन भनेर अन्र्तवार्ता दिएपछि करिश्माले उनलाई जवाफ दिइन् ।

ढुकढुकी फिल्मको सङ्लो सङ्लो पानीमाथि बोलको गीत शेयर गरेर कश्मिाले जवाफ दिएकी छिन्–‘दिपेन्द्र भन्नेले भनेको सही हो ? हामी सपनामा बाच्थ्यौं ।’ करिश्माले केही समय अघि एकजना निर्देशकले पुराना कलाकारको अस्तित्व स्विकार नगरेपछि आक्रोशित भएर एउटा स्टाटस लेखेकी थिइन् । उनले, आफूहरुको अस्तित्व फिल्म क्षेत्रमा नभएको हो भनेर प्रश्न गरेकी पनि थिइन् । फिल्म क्षेत्रमा नयाँ र पुराना पुस्ताको योगदानको बहस चर्किएको छ । करिश्माले मात्र यसको जवाफ दिइरहेकी छिन् ।