लकडाउनमा प्रदीपको म्युजिक भिडियो मोह

पछिल्लो समय फिल्म कलाकारहरु धमाधम म्यूजिक भिडियोमा देखिने ट्रेन्ड बढेको छ । कतिपयले यसलाई फिल्मको आम्दानीले मात्रै जीवन धान्न गाह्रो हुनेभन्दै यसलाई आफ्नो बाध्यतासमेत बताउने गरेका छन् भने कतिपयले यो पनि कलाकै एउटा माध्यम भएकाले अभिनय गर्नु स्वभाविक हुने प्रतिक्रिया दिने गरेका छन् ।

यही भिडमा पछिल्लो समय थपिएका छन्, अभिनेता प्रदिप खड्का । कोरोना महामारीका कारण आफ्नो रिलिजको तयारीमा रहेको फिल्म ‘प्रेमगीत–३’को रिलिज स्थगित भएपछि उनले यहीबीचमा दुुईवटा म्युजिक भिडियामा काम गरेका छन्
पहिलो पटक उनले ‘सुनौलो दिन फर्किनेछ’ बोलको म्युजिक भिडियोमा अभिनय गरेका थिए भने उनको अर्को भिडियो ‘जय जय नेपाल’ पनि सार्वजनिकको तयारीमा छ ।
नितिन चन्दले निर्देशन गरेको यस म्युजिक भिडियोको गीतलाई सत्यराज आचार्य, स्वरुपराज आचार्य, प्रताप दास, प्रविशा अधिकारीले गाएका छन् । हालै यस गीतको पोस्टर सार्वजनिक भएपछि उनको म्युजिक भिडियो मोह बढेको देखिन्छ । कि लकडाउनमा फिल्मको सबै काम ठप्प भएपछि आम्दानीको विकल्प बनेको हो म्युजिक भिडियो ?