आफ्नै घरमा सुटिङ गर्दै शाहरुख खान

कोरोना महामारीका कारण फिल्म क्षेत्र ठप्प भएपछि बलिउडका कलाकार लामो समय ‘होम क्वारेन्टाइन’मा बस्न बाध्य भए । यो बीच धेरैले घरमै बसेर फिल्म हेर्ने, पुस्तक पढ्ने, परिवारसँग समय बिताउने, खाना बनाउने लगायत अनेक गतिविधिमा सक्रियता देखाए । लकडाउन विस्तारै खुकुलो भएपछि अहिले धेरैजसो बलिउड कलाकार काममा फर्किन थालेका छन् भने केहि अभिनेताहरू घरमै सुटिङ गरिरहेका छन् ।

प्रसंग हो, बलिउड अभिनेता शाहरुख खानको । उनले पहिलोपल्ट आफ्नै घर मन्नतमा सुटिङ गरेका छन् । उनले आफ्नै घरमा सुटिङ गरेका केहि तस्विर तथा भिडियोका दृश्य पापाराजी विरल भयानीले सार्वजनिक गरेका थिए । भिडियोमा शाहरुख बालकोनीमा उभिएर केही डायलग बोलिरहेजस्तो देखिन्छ । यो कुन प्रोजेक्टका लागि सुटिङ भइरहेको हो, केही खुलेको छैन । तर, शाहरुख निकै उत्साहित देखिएका छन् । सायद लामो समयको अन्तरपछि सुटिङ गर्न पाएर हुनसक्छ ।