सुशान्तको प्रिय कुकुर : मोबाइलको स्क्रिनमा उनको फोटो हेर्दै

मान्छे र कुकुरको सम्बन्ध कतिसम्म गहिरो र प्रिय हुन्छ, त्यो त हामीले हाम्रै वरिपरि देखेकै हौँ । यस्तै सम्बन्धमाथि थुप्रै सिनेमासमेत बनेका छन् ।

बलिउड अभिनेता सुशान्त राजपुतको पनि कुकुरसँग निकै नजिकको सम्बन्ध थियो । । त्यसैले त सुशान्तलाई गुमाउँदा अहिले उनको कुकुर गहिरो शोकमा रहको खबर र तस्बिरहरू बाहिर आइरहेका छन् ।

यतिखेर सुशान्तको प्रिय कुकुर फज सोसियल मिडियामा भाइरल छन् । सुशान्तले आत्महत्या गरेयता उनको प्रिय कुकुर निराश रहेको तस्बिरहरू सोसियल मिडियोमा पोस्ट भइरहेका छन् ।

एक भिडियोमा फजले घरको कुनाकुनामा सुशान्तलाई खोजिरहेको देख्न सकिन्छ । भिडियोमा कुकुर कहिले शान्त भएर बस्छ, कहिले मोबाइलको स्क्रिनमा सुशान्तको फोटो हेर्दै निराश देखिन्छ ।

कलाकार मनवीर गुर्जरले १८ जुनमा सुशान्त र उनको कुकुरको फोटो राख्दै एक ट्विट गरेका थिए, ‘अरु कोही नभए पनि यसले त तिम्रो महत्व आज पनि जान्दछ ।’

सुशान्त आफ्नो कुकुरलाई निकै प्रेम गर्थे । सायद उनलाई लाग्थ्यो, यो संसारमा कोही मान्छे पनि खास भरोसा गर्न लायक छैन । त्यसैले दुई वर्षअघि उनले आफ्नो कुकुरको नाममा भावुक पोस्ट गरेका थिए । उनले लेखेका थिए, ‘यदि तिमीले मलाई सम्झियौँ भने बाँकी सबैले बिर्सिएकोमा मलाई पर्वाह हुने छैन । माई लभ, फज ।’

अहिले कहाँ छन् फज ?
सुशान्तको आत्महत्यापछि उनको कुकुरले खानपिन छाडेको र त्यही कारण उनको मृत्यु भएको सोमबार सामाजिक संजालमा अफवाह फैलियो । जबकी पिंकभिलाले यो खबर झुठो रहेको लेखेको छ । साथै, फजमात्रै नभएर सुशान्तका चारवटै कुकुर पावना हाउसमा सकुशल रहेको बताइएको छ ।