प्रधानमन्त्रीको गीत छायांकन सम्पन्न (फोटो सहित)

रमेश पौडेलको संयोजनमा किरण कृयशनद्वारा निर्माण गरिएको “समृद्ध नेपाल सुखी नेपाली” एल्बममा समाबेश प्रधानमन्त्री के पि शर्मा ओलिद्वारा रचना गरिएको गीत “स्वदेश मै रोजगारी……” को म्यूजिक भिडियो सुटिङ सम्पन्न भएको छ । नेपाल चलचित्र कलाकार संघको सहयोगमा निर्माण भएको भिडियोलाई निर्देशक मोहन निरौलाले निर्देशन गरेका छन् । भिडियोमा पवित्रा आचार्यको कोरियोग्राफी रहेको छ भने प्रधुम्न मिश्रले दृश्यलाई क्यामेरामा कैद गरेका छन् । शान्तिराम राईको संगीतमा शान्तिराम राई र मेलिना राईले गाएको भिडियोलाई किरण कृयशनले बजारमा उपलब्ध गराउने छ ।

गीतकार के पि शर्मा ओलिले गीतमा ब्यक्त गरेको भाव अनुसार गीतको भिडियो निर्माण गरिएको बताउँदै निर्देशक निरौलाले समृद्ध नेपाल निर्माणको लागि प्रधानमन्त्रीको योजना अनुसार सम्पूर्ण नेपालीलाई आफ्नै देश समृद्ध बनाउन एकजुट भई राष्ट्र निर्माणको अभियानमा सामेल हुन आव्हान गरेका छन् ।

मोहन निरौला, रबिन्द्र खड्का, पवित्रा आचार्य, चेत ब. सिंह “राजा”, रामेश्वर बुर्लाकोटी, प्रकृति के सि, रमेश पौडेल, उद्धब भट्टराई, गोपाल ढकाल, जीवन थापा, सुनिल कटुवाल लगायतको अभिनय र बिनिद बमको सम्पादन रहने भिडियो यसै साता सार्वजनिक हुने बताउँदै एल्बम संयोजक रमेश पौडेलले प्रधानमन्त्रीले सम्पूर्ण नेपालीलाई नेपाल निर्माणको लागि गरेको भावनालाई सांगीतिक रचना मार्फत सम्पूर्ण नेपाली माझ पुर्याउन लागिएको बताए ।