चलचित्र पत्रकार संघको वार्षिकोत्सव सम्पन्न

चलचित्र पत्रकार संघ नेपालले २१ औं वार्षिकोत्सव तथा १८ औं राष्ट्रिय चलचित्र पत्रकारिता दिवस सम्पन्न भएको छ । संघले लकडाउनको कारण वर्तमान अवस्थालाई मध्यनजर गर्दै डिजिटल प्लेटफर्ममा जुम एप मार्फत ईन्टरनेटको माध्यमबाट बार्षिक उत्सब सम्पन्न गरेको हो ।

कोभिड–१९ को महामारी रोगबाट सुरक्षित रहनका लागि जारी गरिएको लकडाउनको आदेशको पालना गर्दै संघले ईन्टरनेटको माध्यमबाट डिजिटल प्लेटफर्म मार्फत आफ्नो वार्षिकोत्सव एवं पत्रकारिता दिवस यसरी मनाउनु परेको हो ।

करिब ७०—७५ जना पत्रकारहरुले सहभागिता जनाएको सो वार्षिकोत्सव एवं राष्ट्रिय चलचित्र पत्रकारिता कार्यक्रममा चलचित्र बिकास बोर्डका सदस्य सचिव महेन्द्र प्रसाद साँखी, चलचित्र निर्माता संघका अध्यक्ष आकाश अधिकारी,चलचित्र निर्देशक समाजका अध्यक्ष रक्षासिंह राणा, चलचित्र संघका पूर्व अध्यक्ष प्रदिप कुमार उदय, नेपाल चलचित्र कलाकार संघका अध्यक्ष रविन्द्र खड्का, चलचित्र प्राविधिक संघका अध्यक्ष पुष्कर लामालगायत प्रतिनिधिहरु सहभागी भएका थिए । सबै अतिथीहरुले डिजिटल प्लेटफर्ममै शुभकामना व्यक्त गरेका थिए ।

यस्तै संघका संस्थापक अध्यक्ष अमेरिकामा रहनु भएका भरत शाक्य, निर्वतमान अध्यक्ष सन्दिप सापकोटा, पूर्व अध्यक्षहरु विदुर गिरी र शान्तिप्रिय, संघका सल्लाहकारहरु विजयरत्न तुलाधर र डब्बु क्षेत्रीले पनि शुभकामना मन्तव्य राखेका थिए ।