“सीमा विवादको समाधान संयम बनेर गरौ” – सिताराम कट्टेल

भारतले नेपाली भूमि लिपुलेक अतिक्रमण गरेपछि यसको चौतर्फी विरोध भईरहेको छ । हालै अभिनेता तथा सामाजिक अभियन्ता सिताराम कट्टेल (धुर्मुस) यस बिषयमा बोल्दै नेपाली भूमि फिर्ता गर्न भारतले यथासक्य छिटो कदम चालोस् भनेका छन् ।

त्यस्तै उनले पटक–पटक हुने सीमा विवादले सामाजिक अस्थिरता, तथा राजनैतिक विचलनसमेत हुन सक्ने हुँदा यसको दीर्घकालिन समाधानका लागि आवेगमा नआइ संयम बनेर अगाडि बढ्न आग्रह गरेका छन् ।

यस्तो छ उनको फेसबुक स्टाटस –

विभिन्न समयमा नेपालको सीमा मिचिरहने र विवादमा आइरहने भारतले आफ्नो स्वभावलाई पछिल्लो कदम अन्तर्गत लिपुलेक हुँदै चिनको तिब्बतस्थित मानसरोवर जाने सडक निर्माणले प्रष्ट पारेको छ । कालापानी, लिपुलेक र सुस्तामात्र होइन, नेपाल–भारत सीमाका ७१ स्थानमा भारतीय पक्षले सँधै विवाद निकाल्दै आएको छ। तसर्थ स–सम्मान नेपाली भूमि फिर्ता गर्न भारतले यथासक्य छिटो कदम चालोस् भनी आग्रह गर्दछौँ । साथै नेपालले पनि अन्तर्राष्ट्रिय कानुन अनुरुप कूटनैतिक ढंगबाट सीमा विवाद सुल्झाउन पहल गरोस् भन्ने चाहन्छौँ । हामीलाई सीमा मिचेर ठूलो भुभाग भएको छिमेकी हैन ठूलो हृदय भएको छिमेकी चाहिएको हो । जननी जन्म्भूमिस्च स्वर्गादपी । हामी सबैलाई हाम्रो जन्मभूमि स्वर्गभन्दा प्यारो छ । त्यसैले, पटक–पटक हुने सीमा विवादले सामाजिक अस्थिरता, तथा राजनैतिक विचलनसमेत हुन सक्ने हुँदा यसको दीर्घकालिन समाधानका लागि आवेगमा आएर हैन संयम बनेर अगाडि बढ्न सम्बन्धित सबैसँग अपिल गर्दछौँ ।

केहि दिन अघि भारतले लिपुलेक हुँदै मानसरोवर जाने सडक निर्माण गरिरहेको खबर बाहिरिएको थियो ।