लकडाउनमा घर-घर बाटै संगीतकर्मीहरुको सहकार्य, गाए ‘मलाई एकछिन देउ’

लकडाउनमा रहेका संगीतकर्मीहरुले आ-आफ्नै ठाउँमै रहेर गीत गाउँदै भिडियो तयार पारेका छन् । ‘मलाई एकछिन देउ’ बोलको उक्त गीतमा न्यूह बज्राचार्य, योगेश्वर अमात्य र जेम्स प्रधानले स्वर दिएका छन् । प्रसिद्ध गीतकार दुर्गालाल श्रेष्ठको शब्द रचना रहेको गीतमा न्यूह बज्राचार्यको संगीत रहेको छ । त्यस्तै गोपाल रसाइलीले गितार र सुन्दर महर्जनले पर्कसनमा साथ दिएका छन् । सबैजना आफ्नो आफ्नो घरमा सुरक्षित बसेर लकडाउनको पालना गरेर गीत तयार पारेका हुन् ।

गीत शेयर गर्दै जेम्स प्रधानले लेखेका छन् – “हाम्रो अघिल्लो सांगीतिक प्रयास साह्रै मनपराईदिनु भयो र अर्को पनि गर भनेर सल्लाह दिनु भएकोले हामीले तपाईहरुको आदेश मानी फेरि अर्को गीत प्रयास गरेर उपहार स्वरुप टक्य्राऊदै छौँ” ।

यस अघि पनि न्यूह बज्राचार्य, योगेश्वर अमात्य, जेम्स प्रधान र सुन्दर महर्जन मिलेर योगेश्वर अमात्यको गीत ‘क्या बोर भयो’ तयार गरेका थिए । उक्त भिडियोलाई धेरै दर्शकहरुले मन पनि पराएका थिए ।