दिनेश डिसीकी छोरीको अनलाइन इन्गेजमेन्ट

बैसाख र जेठ महिनामा धेरैनै बिहेको लगनहरु पर्ने गर्दछ तर लकडाउनको कारण यतिबेला अन्य समय जस्तो रमाइलो संग बिहे गर्ने वातावरण छैन । यहि कठिनाइका बीच निर्देशक तथा संचारकर्मी दिनेश डिसीकी हाल अस्ट्रेलियामा रहेकी छोरी शवा डिसीले आफ्नो प्रेमी मनिष न्यौपानेसंग इन्गेजमेन्ट गरेकी छिन् । यो इन्गेजमेन्टमा नेपाल, अमेरिकामा रहेका उनीहरुका आफन्तहरु अनलाइन मार्फत सहभागी रहेका थिए ।

मेरोफिल्म  सँग कुरा गर्दै दिनेश डिसीले भने –  “पण्डितसंग कुरा गरेर अस्ट्रेलियामा आबश्यक सामग्रीहरु किनिएको थियो । त्यस्तै इन्टरनेटको माध्यमबाट जुम एप मार्फत अनलाइनमा उपस्थीत भएर अन्य बेला झैँ बिशेष पहिरननै लगाएर भिडियो मार्फतनै रमाइलो गर्यौ । पण्डितले आधा घण्टामा सकिन्छ भने पनि पुजापाठको लागि २ घण्टा समय लागेको थियो । सबैले बिशेष खानेकुराहरु पनि आ-आफ्नै घरमा खाएका थिए” ।

दिनेश डिसीले धेरै इन्गेजमेन्ट, बिबाह समारोहहरुमा सामेल भए पनि यसमा भने नौलो अनुभूति भएको बताए । उनले भने – “सार्है रमाइलो र फरक अनुभूति भयो” । उनले यतिबेला धेरै लगन पर्ने हुँदा सामाजिक दुरी कायम गरेर र अनुशासित भएर यस्ता सांस्कृतिक कार्यहरुमा सहभागी हुँदा मनमा आनन्द छाउने बताएका छन् ।

उक्त जोडीको बिबाह बैसाख २२ गते गर्ने भनिएको थियो तर लकडाउनको कारण असमर्थ भएको दिनेश डिसीले जानकारी दिएका छन् । शवाका ८९ वर्षीय हजुरबुबा नातिनीको बिबाह धुमधामका साथ गर्न चाहन्थे तर परिस्थितिले साथ दिएन । इन्गेजमेन्ट पछि अस्ट्रेलियामा कागजी बिबाहको लागि बाटो खुलेको छ । सन् २०२० भरि नै अस्ट्रेलियाले अन्तरराष्ट्रिय उडान नगर्ने भनेकोले उनीहरु समय अनुकुल भएपछि नेपाल आएर बिहे गर्नेछन् ।

(फोटोहरु : दिनेश डिसीको फेसबुक मार्फत)