अमिताभ र आयुष्मानको ‘गुलाबो सिताबो’ डिजिटल प्लेटफर्ममा रिलिज हुने सम्भावना

केहि अघि अक्षय कुमार अभिनित फिल्म ‘लक्ष्मी बम’ डिजिटल प्लेटफर्म मार्फत रिलिज हुन सक्ने खबर बाहिर आएको थियो । हालै अमिताभ बच्चन र आयुष्मान खुराना अभिनित फिल्म ‘गुलाबो सिताबो’ पनि त्यसरी नै डिजिटल प्लेटफर्ममा रिलिज हुन सक्ने सम्भावना बढेको छ ।

फिल्मका निर्देशक सुजित सरकारले मुम्बई मिरर  संगको अन्तर्वार्तामा भनेका छन् – “एक फिल्मकर्मी भएकोले म आफ्नो फिल्म हलमा नै रिलिज होस भन्ने चाहन्छु तर अहिलेको परिस्थिति मान्छेले कहिल्यै नसोचेको, नभोगेको छ । त्यसैले आवश्यक परे डिजिटल रिलिजको लागि म तयार छु । तर हामी मे ३ पछि यसको निर्णय गर्नेछौ” । भारतीय प्रधानमन्त्री नरेन्द्र मोदीले घोषणा गरेको दोस्रो चरणको लकडाउन मे ३ सम्मको लागि कायम रहेको छ । कमेडी विधाको फिल्म ‘गुलाबो सिताबो’ ले अप्रिल १७ लाई रिलिज मिति तोकेको थियो तर कोरोनाको कारण रिलिज हुन सकेन ।