‘ब्रिटेन्स गट ट्यालेन्ट’ को अडिसनमा भीम निरौला, मन पराइयो ‘सन्डे मार्निङ लभ यू’

बेलायतमा बसिरहेका नेपाली भीम निरौला चर्चित टेलिभिजन रियालिटी शो ‘ब्रिटेन्स गट ट्यालेन्ट’ को अडिसनमा सहभागी भएका छन् । उनले शोमा आफ्नो चर्चित गीत ‘सन्डे मार्निङ लभ यू’ गाए ।

उनले गीत गाउन शुरु गरेको एकैछिनमा एक जज साइमन कोवेलले असहमतिको बजर दबाए तर अन्य जजहरुले भने रमाइलो मान्दै निरौलालाई साथ दिएका थिए । उनलाई संचालकहरु, साइमन बाहेकका अन्य जजहरु र उपस्थित दर्शकहरुले संगै गाउँदै, हात हल्लाउदै हौसला दिईराखेका थिए । शोमा दर्शकको रुपमा निरौलाकि श्रीमती पनि उपस्थित थिइन् । निरौला अर्को चरणको लागि छनोट पनि भएका छन् ।

उनको प्रस्तुति सकिएपछि प्रतिक्रिया दिने क्रममा जज डेभिडले ब्रिटिस जनताहरुले उनलाई मनपराउने बताएका थिए ।

 

‘ब्रिटेन्स गट ट्यालेन्ट’ का बिजेताले पुरस्कार स्वरूप दुई लाख ५० हजार पाउण्ड र शाही परिवारको सामुन्ने सांगीतिक प्रस्तुती दिने अवसर प्राप्त गर्नेछन् ।

सात वर्ष अगाडी युट्युबमा अपलोड गरिएको उनको यो गीत ६० लाख भन्दा बढी पटक हेरिसकिएको छ । उनले ५ दर्जनभन्दा बढी गीत गाइसकेका छन् । पेशाले होटल म्यानेजर निरौला सन् २००६ देखि बेलायतमा बस्दै आएका छन् ।