रणवीर र अलियासंग संजय लीला भन्सालीको ‘बैजू बावरा’

रणवीर सिंह निर्देशक संजय लीला भन्सालीलाई मन पर्ने अभिनेता हुन् । रणवीरले भन्सालीका ‘रामलीला’, ‘बाजिराव मस्तानी’ र ‘पद्मावत’ मा काम गरेका छन् र सबै फिल्महरु हिट पनि भएका छन् ।

ऐतिहासिक फिल्महरु भब्यताका साथ देखाउने निर्देशक भनेर चिनिएका भन्सालीले बैजू बावरा माथि फिल्म बनाउने घोषणा गरिसकेका छन् र यस फिल्ममा पनि रणवीर खेल्नेछन् । खबरहरुका अनुसार भन्सालीले रणवीरको डेट कुरिरहेका छन् । त्यस्तै फिल्ममा आलिया भट्ट पनि हुनेछिन् । बैजू बावरा एक गायक हुन् जो आफ्नो बाबुको मृत्युको बदला लिनको लागि तानसेनलाई सांगीतिक प्रतियोगितामा हराउने अभियानमा लागेको हुन्छ ।

आलिया यतिबेला भन्सालीकै ‘गंगूबाई काठियावाडी’ मा काम गरिरहेकी छिन् । कोरोनाको कारण यस फिल्मको काम पनि रोकिएको छ । यो फिल्मको काम सकिएपछि भन्सालीले ‘बैजू बावरा’ को काम शुरु गर्ने छन् ।

सन् १९५२ मा भारत भूषणलाई लिएर ‘बैजू बावरा’ फिल्म बनेको थियो जसको निर्देशन विजय भट्टले गरेका थिए । फिल्ममा उनि दिलीप कुमारलाई लिन चाहन्थे, तर बजेट कम भएको कारण भारत भूषणलाई लिएका थिए । फिल्म सुपरहिट भएको थियो जसमा संगीतकार नौशाद को पनि महत्वपुर्ण हात थियो ।