विवादित सिन हटाएर ‘दबंग ३’ हलमा

भारतीय अभिनेता सलमान खान अभिनित फिल्म ‘दबंग ३’ आज बाट प्रदर्शनमा आएको छ । प्रदर्शन अगावै एक गीतको सिनका कारण फिल्म विवादमा आएको थियो । फिल्मको शिर्ष गीत ‘हुड हुड दबंग’मा साधुहरुलाई ‘ब्याकग्राउण्ड डान्सर’को रुपमा प्रयोग गरिएको सिन गीतबाट हटाइएको जानकारी प्राप्त छ ।

सो दृश्यले हिन्दू भावनालाई ठेस् पुर्याएको भन्दै हिन्दू जनजागृति समितिले आपत्ति जनाएको थियो । समितिले ‘दबंग ३’लाई सेन्ट्रल बोर्ड अफ फिल्म सर्टिफिकेसनको सर्टिफिकेट नदिन समेत आग्रह गरेको थियो । गीतमा सलमान ऋषिमुनीहरुसँग नदीको किनारमा नाचिरहेको दृश्य राखिएको थियो । जहाँ उनी भगवान शिव, विष्णु र ब्रम्हाको भेषमा देखिएका तीन जनासँग आशिर्वाद पनि लिइ रहेका हुन्छन् । प्रभु देवा निर्देशित यस फिल्ममा सलमानसँगै सोनाक्षी सिन्हाको मुख्य भूमिका रहेको छ । सलमान खान प्रोडक्सनले फिल्म रिलिज हुनु भन्दा दुई दिनअघि ट्विटरमार्फत विवादित सिन हटाइएको जानकारी दिएको छ ।