यस कारण सर्यो ‘घामड शेरे’

शुक्रबारबाट रिलिज हुन लागेको फिल्म घामड शेरे अन्तिम समयमा रिलिज नहुने भएको छ । निर्माता तथा वितरकले पर्याप्त सो नपाएको भन्दै फिल्म रिलिज पोस्टपोन्ड गरेका हुन् । काठमाडौंका वितरक स्टेसन फाइभका प्रचण्डमान श्रेष्ठले फिल्मले पाएको सोले सोचेजस्तो व्यापार नहुने देखेपछि रिलिज पोस्टपोन्ड गरेको मेरो फिल्मलाई बताए ।

सो विषयमा प्रतिक्रिया लिन खोज्दा निर्माता तथा निर्देशक हेमराज बिसीले खास बोल्न चाहेनन् । उनले आफू तनावमा रहेको र अहिले पनि स्टुडियोमै रहेको भन्दै यस विषयमा पछि बोल्ने बताए । तर, श्रोतले निर्माण टिमले बिहीबार बिहान प्रेस मिट गरेरर फिल्म रोकिएको सम्बन्धमा जानकारी गराउने तयारी गरिरहेको छ ।

फिल्म रिलिज हुन्छ कि हुन्न भन्ने दोधारका बीच दस दिन मात्र बाँकी रहँदा फिल्मको ट्रेलर सार्वजनिक भएको थियो । सोही कार्यक्रममा स्वस्तिमा खड्काले भने ‘फिल्म सोही मितिमा आउँछ ?’ भन्ने पत्रकारको प्रश्नमा ‘ फिल्म नसरेमा कात्तिक ८ मा आउँछ’ भन्ने उत्तर दिएकी थिइन् । उनको उत्तरले फिल्म आउने नआउने कुरामा कलाकार नै कन्फर्म नभएको अवस्था झल्काउँथ्यो ।