सत्यराज आचार्य र लक्ष्मी बर्देवाको ‘नलाएको माया’

सत्यराज आचार्यको स्वरमा ‘नलाएको माया’ गजलसंग्रह सार्वजनिक भएको छ । गजलकार सुविद गुरागाईको गजल एल्बम ‘नलाएको माया’ शनिबार काठमाडौंमा लोकार्पण गरिएको हो । माता परिवारको निर्माणमा तयार पारिएको सो गजल एल्बम माता इन्द्रमाया पौडेल, अग्रज गजलगो बूँद राना, अग्रज गीतकार तथा कवि दिनेश अधिकारी, गजलगो रवि प्राञ्जल, राष्ट्रियसभा सदस्य विमला पौडेलले लोकार्पण गरेका हुन् । शनिबार भएको बिमोचन समारोहमा सहभागी भएका वरिष्ठ गायक उदय सोताङ, गायक–गायिकाहरू सञ्जीव धिमाल, निरा रानाभाट, बबिना भट्टराई, अस्मिता अधिकारी, श्रेय अगस्तीले गजलगो गुरागाईका शब्दहरूमा प्रत्यक्ष गायन प्रस्तुत गरेका थिए ।

गजलको भिडियो निर्देशन निकेश खड्काले गरेका हुन् भने सत्यराज आचार्य, लक्ष्मी बर्देबा र जोर्डन राजभण्डारीको अभिनय देख्न सकिन्छ । दिपक शर्माको संगीत रहेको गीतमा किरण तुलाधरको संगीत संयोजन रहेको छ । हिना मगरको शृंगार रहेको गीतको भिडियो छायांकन बुद्ध लामाले गरेका हुन् भने सम्पादन विकास धमलाको रहेको छ ।